Activiteiten
4-3-2025
Hermeniezaal en Mèrt
Leedjesconcours 2.0 & Reub begrave
Om 20:11 oer organiseert V.V. De Aomezeikers ein leedjesconcours 2.0. Aansloetend zulle v’r ôs same begeave nao de mèrt bie de Reubevraeter om dao same de Reub te begrave.
Oetneudiging Leedjesconcour 2.0
Dames en Heere, Jonges en Meadjes
Vrunj en vriendinne, Reube en Reubinne
Veer höbbe de eerste schröbbeler inmiddels soldaot gemaak en daomit is ’t vastelaovesseizoen officieel begoos. De oplettende minsj heat os al gespot op de vastelaovesplanning van de Reube. Nao ’t da-ve-ren-de succes van de Aomezeikers vastelaovesquiz van vurrig jaor verzörge veer op vastelaovesdeensdig ein auwt koncep in ein nuuj jeske: ’t Leedjesconcours 2.0, herreze oet de esj.
Mer wie wirk dat dan? Nou het geit es volgt:
Doe geufs van teveure ein leedje of gruupke aan, of doe kums geweun kieke en loestere. Nao opgave kumpse dat leedje zinge veur de ongekende priezepot dea in saamewirking mit De Reube wurt gerealiseerd.
Alles maog; covers, originele nummers of zelfs ein ongekinde solo. Auch karaoke is gedurende de aovend meugelijk!
Gein vrees, höbse plankekoorts? Dan keule veer uch aaf mit ozze eige vastelaoveskraker es iesbreaker.
Ondanks ’t kouwe wear houpe veer uch alvas ein bietje werm te höbbe gemaak veur dit traditionele eind van ’t vastelaovesseizoen en same mit gans Obbeeg ein ongetwiefeld geweldig vastelaovesseizoen aaf te sjloete.
Ein insjriefformulier volg zo sjnel meugelijk, dea motte veer nog effekes oet de hoage circushood van veurig jaor trekke. Jeuk ’t uch té zeer om uch aan te melden, sjik os dan mer ein berichtje.
Zet ‘m uch in de agenda, deensdig 4 maart!
Geer heurt sjnel weer van os, dan gaon veer dit sjieke koncèp oet de auw truukedoas ein gans nuuj leave in blaoze!
