Gisteraovend höb v’r mit ’t begraave van de Reube én ’t aaflaote van òs Reubevlag de vastelaovend in ’t Reuberiek offiesjeel aafgesjlaote. Veer kieke truuk op ein sezoen wat alles hauw; bliedsjap, vööl saamheurigheid, ongerling respèk, mer maakde aug ruumte om same ein tröönke weg te pinke. Soms moosj ’t op karakter, mèr altied mit zien alle.

Veer zeen gruètsj op òzze hoagheden: Prins Jan II, Senioreprins Thieu I, Jeugprinses Esmay en höör adjudantje Pippa, mèr veer zeen auch super gruètsj op ál die fantastiese Reubkes en Reubinnekes die de vastelaovend in òs Reuberiek kluèr höbbe gegaeve. Dank aan eederein dae op wèlke meneer dan auch haet biegedraage aan ’t sjlaage van deze onvergaetelikke vastelaovend!

Veer gaon venaovend nog ein èsjkruuske haole (de mès begint om 19.15 oer in de Willibrorduskirk) en aansjloetend hièringbiete bie Jos en Anita wooveur veer uch natuurlik auch van harte wille oetnuèdige. Dao nao gaon veer hjael aeve in wèntjersjlaop, mèr op de 11e van de 11e zeen veer uch natuurlik weer gaer truuk!

De lètste sjieke foto’s die Wil haet gemaak van de aafsjloeting van de vastelaovend in ’t Reuberiek zeen vanaaf noe te bekieke op òzze site.

Leef Reubkes en Reubinnekes, dank dank dank! Geer waort geweldig!

Tot volgend jaor!