Op zaoterdig 14 jannewarie höbbe veer ’t nuuje jeugprinsepaar van De Reube Obbeeg oetgerope. Dit jaor wurd de Obbeegse jeug veurgegànge door jeugprins Mads I en jeugprinses Fleur.

Jeugprins Mads (Croes) is 10 jaor oud en is eine echte Vastelaoves-vierder; al vanaaf jònge laeftied duit hae mit aan alle Reube aktiviteite. De LVK-leedjes ware dan auch van veur tot achter mitgezònge! Hae haet dit neet van eine vreamde: zien zusse Fenne en Lynn mèr auch zien auwers Ivo & Shirley ginge hëüm veur es Hoaghede in ’t Reuberiek.
Mads zit in groep 7 van BS De Kingbaek en is sjlaagwirker bie ’t sjlaagwirkensemble én bie de jeughermenie van Concondia Obbeeg. Auch is hae kieper van JO10 bie SV Argo, sjpeelt gaer FIFA en is fèn van Max Verstappen.

Jeugprinses Fleur (Wetzels) is 11 jaor en zit in groep 8 van BS De Kingbaek. Acuh bie Fleur zit de vastelaovend in ’t DNA; heure broor Mathijs hing heur al veur ès jeugprins. Fleur is al ein aantal jaor bie de dansmariekes van de Reube, dans auch bie Flashdance en turnt bie Swentibold. Auch sjpeelt ze klarinet bie de jeughermenie van Concoria. Daonaeve is Fleur auch kreatief bezig mit knutsele, hilt van gèzelligheid en aafsjpraeke mit viendinne. Is d’r gèt te doon in Obbeeg? Dan is Fleur van de partie!