Beste Reube en Reubinnekes,

Op zoaterdig 6 jannewarie is Etiënne Hubens oetgerope tot prins van de Reube!Hae zal same mit zien prinses Ellen (Schmeitz) dit jaor regere euver ’t Reuberiek.

Es veurbereiding op deze oetreuping krege alle woonadresse in Obbeeg veur de Kersmis eine flyer mit dao op 11 kandidate. In kombinatie mit Reube-TV waort ‘r flink gesjpekuleerd in Obbeeg: Wae wurd de nuuje prins van de Reube. Tiedes de oetreuping kaome veer sjteeds korter bie ’t èntjwoord..

Prins Etiënne I wirk es wirkboewkundig teikenaer bie Van Schijndel BV in Maasbrach. Same mit ziene jongere broor Guido haet hae ’t bedrief LaserFocus3D opgerich.
Prins Etiënne I sjpeelt hoorn bie Hermenie Concordia in Obbeeg en bie de winnaar van ’t LKZH Zaate Hermenie Neet te Bloaze. Daonaeve is hae in opleiding veur tambour-maitre.

Prinses Ellen sjtudeert Pedagogoek aan de Fontys Hoagesjoal in Zitterd. Zie zit momenteel in ’t driede jaor van de sjtudie en haet nèt heure minor in Nijmege aafgerundj. Ellen sjpeelt alt-sax bie Hermenie St. Cecilia in Beeg- Papenhoave en same mit heure prins bie Zaate Hermenie Neet te Bloaze. Hèndjwirke en bakke zeen de groatste hobbies van ozze prinses.

De leefde veur meziek haet os Obbeegs-Beegse Prinsepaar samegebrach.