Op zunjig 15 jannewarie waor ’t de beurt aan de Obbeegse Seniore. Tiedes eine gezèllige middig zeen Senioreprins Jos I en Senioreprinses Anita ( de Jong) oetgerope tot Seniorepaar van de Reube.

Senioreprins Jos I is geboare in ‘t Braobèntse Baardwijk en prinses Anita in ’t Utregse Vinkeveen. Beide zeen deerenarts en höbbe ze 2 kènjer; Jan en Marike.
Wie Marike jeugprinses waor is bie hun ’t Vastelaovesvirus wiejer gaon kroepe. Os Seniorepaar woont sinds 2004 in ’t veurmalig sjötterslokaal aan de Bornerwaeg, dat mit de Vastelaovend om wurd getovert tot hoeskamerkefee. Jos is altied op zeuk nao singles veur in ziene jukebox en Anita haet altied waal ein hèndjewirkprojek op de haoke- of breinaoje sjtaon.
Same zeen zie lid van Sjötterie St. Willibrordus, wènjele ze gaer en zeen ze gaer bezig om ( mit greunte oet eige moosum) lèkkere geregte te make.